يا حسرته

شافها وشدته، بصالها وعجبته.

كلمها زبلته، قام راسم خطته. 

خالاها حبته، مشاعر وإدته، 

بص لواحدة تانية، كذب ..كرهته.
عرفت نيته، صدق كذبته. 

بعد ونسيته .. والله نسيته. 

عدت الأيام إفتكرها سامحته.

بعت رسالة قال فيها سلام وردته.

اكيد افتكرته، طبعا عرفته. 

سألها جاوبته. 

قام رد بكلمة واحدة "يابخته" فشكرته. 

اتحسر حضرته.

احنا بنشتري راجل

وعدت بنتي هاخدها معايا وأنا بشتريه، لازم تشوف بنفسهااللي هايصونها ويحميها واكيد هايراعيها.  

نطت من الفرحة وقالت هيييييييه، فضلت متنحة ومش مصدقة نفسها اول ماعينيه جت في عينيها.
ده انا لقيته بعد ما دوخت عليه السبع دوخات، وصيتها قبل أي حاجة تشيله في عينيها.
ده قطع غياره الماني موديل السنة دي دوغري كدة مالوش في اللف والدوران. بتاع شغل، هو غالي حبتين بس ميغالاش عليها.
مانا لو كنت سمعت كلام الناس وجبت المصري اللي متلقح علي القهاوي وعامللي فيها سي السيد ( لا لا لا ياساتر ده مالوش فيها)  .
راجل بصحيح كدة تقفيل نظيف فلوس وعربية وأخلاق يعني هايشيل عني وعنها كل الطلبات.

بصي بقى يا بنتي خدي بالك منه وتبتي فيه كويس، ده مفيش رجالة مضمونة اليومين دول واهو ظل راجل ولا ظل حيطة. 

خيانة كرتونية

-  مانا لو كان ليا أب كان خد بحقي منك. بتخوني يا برنس؟! هاتفضل رمرام وغاوي شغالين، طلقني وعايزة حقوقي كلها!!

= هشششت !! بقولك اييييه ماتنسيش أصلك يام حقوق. هي جلابية مبقعة وفردة جزمة إزاز يا سنسن (يقطع الجواز علي عايز يتجوز)

ثم جلست سندريلا تضرب نفسها بالجزمة الإزاز قائلة "أشوف فيك يوم يابرنس"

The Broke up

-  خلاص هاتسيبني بعد حبي وثقتي فيك.؟! مش هاتقدر تنساني، ريحتي، صوت نفسي اللي هايفضل جواك. 

= مش قادر أكمل، مش عايزك تكوني شريكتي، حبيتك ووعدتك وانا عندي أغلى منك وإنتي رخصتي أوي في نظري حتى لو غالية في عيون الناس. صرخت وقالت لأأأأأأ بلاش أرجوك حرام عليك. ورمى بإيدية آخر سيجارة وحلف ماهيشربها تاني لآخر نفس ف عمره. 

جواب

قررت تعدي على بيتهم القديم قبل ماتدفع إيجاره لجيرانهم بتوع زمان ،بكيت وصرخت قالت محتاجة رد منك يالي في الصورة رحتي من سنين، خلصت المشاوير ورجعت بيتها لولادها وحياتها،دورت في جوابات قديمة يمكن تلاقي كلمة أو  حتى سطر منها، لقيت بخطها جواب وكان الرد فيه "بنتي  يا حبيبتي اليسر دايما بعد كل أمر عسير".