على الرصيف

- فاضل 3 ساعات على القطر يا أمي والنهاردة زحمة وده وقت خروج الموظفين، وإيه كل الشنط دي؟ ده كلها كام يوم وراجعين. 

= يووووه يابني ده فرح إبن عمك عقبال مافرح بيك وتخلف بدل العيل اتنين. 

وصلنا المحطة وفاضل يجي تلت ساعة دايما كدة متأخرين، ده سفر 12 ساعة في القطر أرحم من سواقة في مصر ساعتين. 

أنجشت بأيدي الحاجة وانا ماسك شنطة والايد التانية بجر شنطة سفر تانية على كيسين. ما تشدي حيلك يا أمي ده فاضل 5 دقايق وانا ماصدقت حجزتلنا تذكرتين. فجاة صوتها جه من ورايا " حاسب يللا بسرعة مفيش وقت " ،وفي اقل من ثانية خطفت مني شنطين. "عربية كام وكرسي ايه بسرعة؟" جاوبتها وهي بتجري وبتاخد الخطوة في اتنين. 

= يابني حاسب لاتكون حرامية؟!
- متخافيش يامما حرامية ايه دول يادوب كام بشكير على غيارين. طرت بالحاجة ده الحِمل خف كتير ويدوب دخلنا العربية لقيت الشنط وكل حاجة في مكانها فوق الكرسيين. طب هي مين وراحت فين معرفش؟ سألوني طب شكلها ايه حلوة .. طويلة ؟ اوصفلنا اي حاجة فيها حتى لو بس لون العينين؟ .. مش فاكر اي حاجة ده انا مالقتلهاش اثر. نفسي بس الاقيها واوصلها واقولها يابت ياجدعة انتي مش كنتي تيجي معانا البلد ونعمل بدل الفرح فرحين.

مرايتي

وقفت أمام مرآه حمامها كعادتها كل صباح، نفس السؤال تسأله لنفسها " من أنا ؟". تتأمل شعرها الطويل الداكن ذو الخصلات البيضاء، حتى بشرتها وكل تفصيلة في وجهها، ابتسمت وتذكرت كم كانت تتمنى مثل هذا الشكل الذي يفكرها دائما بأغلى امرأة في حياتها. 

- (أنتي هي فلا تستغربين)ترد مرآتها بكل ثقة.

-نعم هي بكل صورة لها خفة روحها وجاذبيتها التي تتغلغل بداخلك، ابتسامة وجهها التي تزيدها نضارة وجمال يشرق من بين عيناها كأشراقة خيوط الشمس بين السحاب في جو ممطر دافيء. الأمر ليس بيدك فأنتي امتداد لوجودها، هي رحلت بعيداً لا تنتظريها بل هي داخلك فلا تبحثي عنها خارجك.

الحركة بركة

لما قالولي دي عربيتك وراكنة تحت البيت والمفاتيح اهي يللا بقى خديها. إتفاجأت وقررت وقلت آه هاتعلم عليها. على كبر قررت أتعلم واخش بقلب جامد وابلطج عللي يبلطج عليها. صغيرة بس بيخافو منها جدا أصلها صاج مش فايبر زي معظم اللي حواليها.

وانا طبعا مصدقتش إلا بعد عشرة طويلة بيننا قدرت تحتويني واحتويها.

قصتها بدأت في طريق الساحل يعني عشرية وتحب الفسح والخروج وتكره الكآبه زي عينيها.

في الزحمة تسخن ومع نفسها تقولي هووووب إهربي من أي فتحة شارع قصادك تلاقيها. 

بركة دي مش بس عربية لا دي ستر وغطاء يارب خليها. 

اللي يشوفها يقولي شبهك أصلي بلاقي نفسي فيها.

مفيهاش غير لسان

- إحم احم  

= جاهزة؟ 

- ايوة يا أستاذ، بس انا خايفة أوي. 

= متخافيش ها يللا ركزي لوسمحتي!! 

- حاضر .." الهااااا"  

= لا إعلي شوية بصوتك!! 

- "الههههههههههههاااا"  

= متزعقيش وافتحي بقك وانتي بتقوليها.

- يووووه أقولها ازاي طيب؟ "اللللللهههههههااااااااا" 

= ممطوطة ممطوطة، قوليها عادي يعني. 

- يا أستاذ مش عارفة أركز من كلام حضرتك. 

دي كانت أول وآخر وقفة ليها قصاد المايك، مكسوفة ومحرجة أصلها عمرها ماتكلمت بجد  قصاد الناس، تسجيل واستوديو، وكمان بالفصحى، لقيت نفسها خلاص هنا ده هي مفيهاش غير لسان.  

= يللا يا آنسه؟ هو مورناش غيرك!!!؟ 

-احم احم "الهاااااااتف الذي طلبته مرفوع مؤقتاً من الخدمة يرجى إعادة المحاولة فيما بعد". 

=براڤووووا هايلة سجل يابني، جاهزولنا بقي لسان تاني تقول نفس الكلام  ده بالانجليزي، اللي بعده!!! 

صوت في الزحمة

صوت كلاكس بتاع ديليفري اللي عمال يكافح علشان يوصل طلب.

صوت مدام نادية بتصرخ في ابنها اللي خد انذار رفد وبقي قليل الأدب.

صوت زهق وانتظار وزحمة لحد دلوقتي ماعرفتلهاش سبب.

صوت راديو مفتوح على الآخر عليه إذاعة أغاني وطرب. 

صوت خناقة ما بين واحد حك عربيته ف عربية العضو المنتدب.   

صوت زعيق واحد بيضرب مراته وسط الإشارة، حقيقي راجل ومربي الشنب. 

صوت سارينة. صوت فرامل. صوت تكاتك. صوت كبالن.  

صوت كبوت من الحر طقطق صاحبه عايز يجري يلحق يشوف ماتش المنتخب.  

صوت بتاع مناديل معدي.. ولاعات.. أباجورات.. 

أصوات كتير نسمعها دايما في عز الزحمة اللي مالهاش نهاية وياللعجب.

يا حسرته

شافها وشدته، بصالها وعجبته.

كلمها زبلته، قام راسم خطته. 

خالاها حبته، مشاعر وإدته، 

بص لواحدة تانية، كذب ..كرهته.
عرفت نيته، صدق كذبته. 

بعد ونسيته .. والله نسيته. 

عدت الأيام إفتكرها سامحته.

بعت رسالة قال فيها سلام وردته.

اكيد افتكرته، طبعا عرفته. 

سألها جاوبته. 

قام رد بكلمة واحدة "يابخته" فشكرته. 

اتحسر حضرته.